क्रिस खिचिएको ठाँउमा नाल्बोले नयाँ फिल्म खिच्ने

बैशाख पन्ध्र गते देखि सुरू हुने प्रोजेक्ट मेरो भ्यालेन्टाईनको सुटिङ सकिए लगत्तै निर्देशक सुरज सुब्बा नाल्बो 'प्रमिस' टाईटल तय गरिएको नयाँ फिल्म निर्देशनमा जुट्दैछन् । सिङगापुरका लगानीकर्ताको सहयोगमा नाल्बोले दुई साथीले गरेको प्रमिसको बिषयमा केन्द्रित रहेको रिभेन्ज ड्रामामा आधारित सो फिल्म बनाउने तयारी गरिरहेका हुन् । जसका लागि नयाँ बर्षको छेकेमा उनी सिङगापुर लोकेशन हन्टका लागि गएका थिए र फेला पारे बलिउड बल्कबष्टर फिल्म क्रिस सुटिङ भएको स्थान सन्टेका सिटी ।
 
पाँच दिने भ्रमणबाट बुधबार नेपाल फर्किएका नाल्बोले शो स्थान सहित स्कोच पार्क, हाउपर भिल्ला, मुस्तफा, जुसईङ, आर्थर रोड, बोटानिक गार्डेन, पोरकोनिङ पार्क र हेण्डेन ब्रिजको सुन्दर लोकेशन प्रमिसका लागि तय गरिएको बताए । पाईप लाईनको सो प्रोजेक्टको ६० प्रतिशत सुटिङ सिङगापुरमा गर्न लागेको जानकारी गराएका नाल्बोले फिल्ममा केकी अधिकारी लिड रोलमा फाईनल गरिएको बताए । फिल्ममा विल्सन विक्रम राई, अनुराग मान सिंह कुवँर, मतिन खान, सुमन गैरे सहित डेब्यू गर्दै दुई नयाँ अनुहार रमेश चन्द्र राई र नरकुमार लिम्बुलाई मेन काष्टमा छनौट गरिएको छ ।  'म कन्टिन्यू तीन वटा फिल्म सिङगापुरमा खिचेर त्यहाँको सोसाईटीसंग फ्यामिलियर हुन चाहन्छु त्यसैले दोस्रो पटक मैले सिङगापुरलाई रोजेको हुँ',  नाल्बोले भने ।   



यस्तै नाल्बोले सिङगापुरमा दोस्रो विश्व युद्धताका मारिएका नेपालीहरूको समाधिस्थलको मनोरम दृश्य र चाईनिजहरूको समाधिस्थलमा पनि फिल्म खिच्ने निर्णय गरिएको बताए । उनले भने, 'यो हाम्रो लागि पनि ईतिहास हो । फिल्म बनाउने मात्र हैन ईतिहासलाई सुरक्षित पनि गर्न जान्नु पर्छ ।' प्रमिस खिचेको केही महिना भित्रै बाटो मुनिको फुलका प्रोड्यूसर राजेश घतानीको फिल्म 'वितेका पल' समेत सिङगापुरमा खिचिने उनले बताए । यो बिषयमा नाल्बो भन्छन्, 'अब दर्शकलाई नयाँ टेष्ट चाहिएको छ त्यसैले क्वालिटी फिल्म दिन मैले अन्य मुलुक रोजेको हुँ । अब मेरो हरेक प्रोजेक्ट विदेशमा थोरै पर्सेन्ट भए पनि सुट हुनेछ ।'

मेरो भ्यालेन्टाईन सकिए लगत्तै उनी पोष्टप्रोडक्सनको काम थन्क्याएर असार ६ गते २२ दिनका लागि प्रमिस टोली लिएर सिङगापुर उड्ने छन् । टिएनआरजी कम्पनीले निर्माण गर्न लागेको नाल्बोको सो फिल्मको स्टोरी टंक लिम्बुले लेखेका हुन् भने उनको क्याम्पका सञ्जय लामा क्यामेरा पर्सनको रूपमा छन् । यस्तै फाईट रोशन श्रेष्ठ र म्युजिक महेश खड्काको रहने छ । उनीद्धार निर्देशित बहुप्रतिक्षित फिल्म सायद बैशाख २९ गते देखि रिलिज हुदैछ भने फेसबुकको पनि रिलिज पब्लीसिटी सुरू गरिएको छ ।